Best Cv Template | إزاي تعمل سي في بروفيشنال

Home

إزاي تعمل سي في بروفيشنال؟


سواء كنت لسه طالب و بتقدم cv بتاعك لتدريبات عن بعد للبنوك و للشركات بتقدمة حاليا
 او كنت لسة طالب و مش عامل cv لنفسك اصلا  و فاهم ان ال cv ده للي متخرج بس او كنت لسة خريج فريش 
و بتفضل تقدم وماحدش بيتصل بيك

أول حاجة اقرأ الكلام للأخر وماتعملش save للمقال
وأبدأ إعملة من النهاردة ... " كل حرف مكتوب مهم "

الكلام ده لو خد منك 15 دقيقة قراءة فا تخيل بقى هو خد منى كتابة قد إيه !
فاماتكسلش تقرأ ... ها

إيه الـCv ده وإيه فايدتة ؟


الـCV هو ملخص عنك وعن خبراتك سواء كانت دراسة أو تدريبات أو كورسات أو تطوع أو مهارات....

الـ Cv مهم لأنه

-  يعتبر حلقة الوصل بينك وبين الشركة أو المكان اللى انت عايز تدرب أو تشتغل فيه
-  يعتبر هو نص الطريق الأول "لأنه هو اللى هيوصلك للإنترفيو"

النص التانى اللى هو الأنترفيو علشان يتأكد من النص الأول

سألت نفسك لما يكون ال HR قدامة مثلا 300 أو 400 Cv وهو محتاج يكلم وليكن 10 إيه اللى يخليه يكلمك؟


الـ Cv بتاعك وطريقة كتابتة وطريقة عرضك لمهاراتك

لازم دايما تطور منه وتعملة update
طبعا هتطور منه عن طريق انك هتطور من نفسك

فا لو انت مش كاتب Cv كويس ومش عارض مهاراتك صح

كل مرة هتلاقى ترتيبك وليكن 250 أو 200 أو حتى 50 ..بس هو عايز مثلا 10 !!!
وترجع تقول هما ليه مش بيتصلوا بيا

الـCv بتاعك على أساسه انت اللى هتحدد

تشتغل فى شركة كبيرة أو انترناشونال ولا شركة لوكال أو بير سلم !!!
ف لازم لازم لو انت طالب دلوقتى تبدأ تعمله و تعرف ايه اللى ناقصك وتبدأ تشتغل عليه وهتعرف اللى ناقصك من الكلام اللى تحت ..
بص من الأخر علشان الـ Cv بتاعك يكون كويس لازم تعرف تبيع نفسك صح

فى البداية بنكتب الـCv بنفس الترتيب ده 


اولا 

- إسمك رباعى بخط عريض فى نص الـCv
وتراعى إن أول كل حرف من إسمك يكون Capital ويكون حجم الخط من 18 - 22 زى كدة 

Medhat Ibrahim Siddiq Ibrahim

لاحظ أول حرف لازم يكون Capital

 - عنوانك
 - رقم موبايل
 - الإيميل

وطبعا الميل ماينفعش يبقى أسماء مستعارة أو مختصرة زى كدا "mEd7aT@gmail.com"
لا .. لازم يبقى فورمال زي مثلا "Medhat.Ibrahim@gmail.com"


ثانيا 

 Objective

من أهم الأجزاء وممكن على أساسة الـ HR يكمل قراءة الـCv أو لأ
معظم الناس بتكون فاكرة ان انت بتكتب هنا هدفك أو (الوظيفة اللى انت عايزها) بس!!
ناس كانت بعتالى الـCv وكاتبة فيه كدا بالنص
Seeking a working as a medical representative in your company.
طبعا الكلام ده غلط .. يعنى انت عايز تاخد بس!! .. طب انت هتدى إيه أو إيه اللى بيميزك أو هتضيف إيه للشركة!!! 

الصح انك بتكتب ايه خبرتك أو اللي بيميزك علشان تشتغل في المجال ده " تدريب أو تطوع أو كورسات أو شغل قبل التخرج فى نفس المجال أو دراستك" .. يعنى انت هتدي ايه للشركة مقابل هدفك ده

يبقي هنا لازم بنكتب حاجتين
ايه الحاجة اللى بتميزك علشان تشتغل فى المجال اللى انت كاتبه (نقاط قوتك أو خبرتك أو دراستك) + هدفك (وظيفتك)

فيه ناس بتجيبة Copy&past من على النت طبعا كل الHR حافظين الكلام ده ودا كفيل للفلترة المبدأية
ماتستاسهلش واكتبه بطريقتك


ثالثا 

 Work experience
الأماكن اللى اشتغلت فيها ودورك كان فيها إيه وبدأت الشغل فيها إمتى ومدة الشغل كانت قد إيه

وبنكتب أخر مكان اشتغلنا فيه فوق خالص
يعنى الترتيب على حسب الأحدث مش الأهم يعنى اخر حاجة اشتغلتها فوق خالص والأقدم منها تحتها وهكذا

طبعا لو انت طالب وما اشتغلتش مش شرط تكتبها ودا هيعوضها الجزء بتاع الأنشطة الطلابية والتطوع
ولو ما اتطوعتش فيه جزء تانى هيعوضها برضو  هتعرفة تحت


رابعا

 Educational background
بتكتب دراستك هنا سواء كلية أو ماستر أو دكتوراة
وتخصصك وتقديرك

أخر حاجة انت حصلت عليها بتتكتب فوق.
يعنى لو انت معاك ماجستير بتكتبه فوق خالص وتحته البكالوريوس وهكذا...

مثال :-
  • Bachelor's degree in science, Faculty of science, Al Azhar University in Cairo
  • Major: Microbiology and Chemistry department
  •  Grade: Very good.
وبتكتب مشروع التخرج برضو وتقديرك فيه

لو إنت طالب بتكتب انت فى الفرقة الكام أو بتكتب السنه اللى انت متوقع هتتخرج فيها


خامسا

 Internships

دى التدريبات الصيفية اللى انت ادربت فيها
ناس كتير بتكتبها Summer training لكن الصح Internships
طبعا لوكتبتها training انت ما غلطتش غلط فادح ولا حاجة
بس لو كتبت Internships هيعرف إنك حد بروفيشنال وفاهم

الفرق بينهم بإختصار

الـ internship ده لو انت لسه طالب و الشركه ادتك فرصه تدريب تتعرف علي طبيعه الشغل بنظره عامه

الـ training ده لو انت خلاص اشتغلت فى الشركه بيديك فتره تتعرف فيها علي طبيعه الشغل كله و ازاي بيتم بالتفاصيل أو حتى لو هتاخد أى تدريب وانت فى أي وظيفة بيكون إسمه training


سادسا

Extracellular activities

من أهم الحاجات اللى بتقوي الـ Cv بتاعك وممكن تترفض أو تتقبل فى منحه بسببها وأعرف واحد معاه دكتوراة كان بيترفض بسببها لأنهم كانوا عايزين شهادة خبرة انه اتطوع فى أى كيان أو مؤسسة لمدة سنه...

بتكتب الأنشطة اللى كنت متطوع فيها سواء طلابية أو جمعيات خيرية
وماتكتبش المكان بإختصار وليكن "ABC"
لأ إكتب الإسم كامل
وتكتب دورك فيه كان إيه وليكن member of public relations committee
وتكتب نبذة سطر أو اتنين تعريف ب المؤسسة دى


سابعا

 skills
اللغة والكمبيوتر ومهاراتك

 language️
فى ناس بتكتب انها مستواها فى الـEnglish مثلا Very good علطول
لكن الأفضل إنك بتكتب مستواك فى كل جانب من جوانب اللغة وكل لغة بيكون ليها 5 جوانب
Listening .. Writing .. Reading .. Speaking .. Thinking
إحنا بنكتب أول أربع جوانب بس 
مثال :-
- English
good in listening, very good in Writing, very good in reading and good in speaking.

وممكن تكتب مستواك فى اللغة
A1/A2–B1/B2–C1/C2
وأنا بفضلها بالطريقة دى
وهتلاقيها مشروحة فى الأسطمبة اللى هبعتهالك تحت

Computer skills
بتكتب مستواك فى برامج الأوفيس أو إستخدام الإنترنت عموما ولو بتعرف تشتغل على أى برامج تصميم أو غيرها بتكتبها

مثال :-
- good command of Microsoft office™ tools.
- good command of Photoshop and illustrator tools.
- I use internet tools sufficiently and effectively

 personal skills
ناس كتير بترص هنا عشرومية مهارة!!
ناقص يكتب مهارة Watching TV skills 
الصح والأفضل إنك بتكتب المهارات اللى عندك فعلا أو إكتسبتها وبتكتب انت اكتسبتها ازاي
ماهو المهارة دى إنت مااكتسبتهاش من فراغ

مثال :-
مهارة مثلا زي مهارة التواصل هتكتبها وتكتب انت اكتسبتها ازاي
- Communication skills gained through my experience as a head (member) of public relation committee in a "إسم التيم أو النشاط" Team
أو ممكن تكون إكتسبتها فى شغل زى الميديكال برضو

لو عندك مهارة مثلا زى الProblem solving هتكتب إنت اكتسبتها منين

نفس الحكاية فى باقى المهارات

ثامنا

 Conferences and workshops
برضو مش لازم تكتب هنا العشرومية مؤتمر اللي انت حضرتهم 
إكتب اللي انت حضرته واستفدت منه وطلعت بمعلومات كويسة وفاكر مين المحاضرين.... إلخ
مننساش الترتيب على حسب الأحدث مش الأهم يعنى اخر حاجة حضرتها فوق خالص والأقدم منها تحتها وهكذا

  •  personal information
  •  Date of birth:
  •  Nationality:
  •  Gender: Male/Female
  •  Marital status:
  •  Military service: Exemption/postponed/Finished

طيب دلوقتى لو انت اتخرجت وماكنتش بتشتغل على نفسك تدريب أو تطوع أو غيرهم

هتبدأ تعوض ده عن طريق إنك تاخد كورسات أونلاين فى مجالك وتطور من نفسك

إزاى تكتب الكورسات سواء أونلاين أو على أرض الواقع أو دولية فى الـ Cv ؟


- الأونلاين

بتزود section إسمه  Professional Training

مكانها فى الـCv بعد الWork experience

1- كورسات أكاديمية
بيكون بيشرحها دكتور جامعى أو باحث
ودى بندرسها على مواقع زى Coursera/edx /MIT
- بيتكتب بالصيغة دى
إسم الكورس+ إسم الجامعة + إسم المحاضر+ نبذة سطر أو اتنين للمحتوى اللى طلعت بية من الكورس

2- لو كورسات غير أكاديمية
بيكون بيشرحها خبير بالمجال مش دكتور أو محاضر فى الجامعة
ودى بندرسها على مواقع زى Lynda/Udemy
بيتكتب بالصيغة دى
إسم الكورس+ إسم المحاضر+ نبذة سطر أو اتنين للمحتوى اللى طلعت بية من الكورس

..........................................

 3- الكورسات الدولية المعتمدة
بتزود section إسمه  Certificates
مكانها فى الـ Cv بعد الSkills
الكورسات دى زى مثلا ال TOEFL أو ال ILETS

.........................................

4- الكورسات العادية اللى أخدتها على أرض الواقع
بتزود section إسمه Courses
مكانها فى الـ Cv بعد ال Certificates

 بعض الملاحظات لازم تاخد بالك منها "مهم جداً "

  •  ال Cv لازم تعملة على ال Word وتعمل نسخة PDF منه
  •  لون الخط فى الـ Cv لازم يكون أسود 
  •  الخط فى الـ Cv يفضل انه يكون فورمال وفيه كذا خط فورمال أفضلهم Times New Roman
  •  حجم خط الأسم يفضل يكون من 18-22 و عناوين الفقرات بيكون 12 و باقى الكلام 11
  •  يفضل ماتخليش عدد صفحات الـ Cv يزيد عن 3
  •  ماتعملش الـCv ب border

تحميل نمودج جاهز للتعديل - من هنا
Best Cv Template | إزاي تعمل سي في بروفيشنال
24 Jobtalk

Comments

google-playkhamsatmostaqltradent